ಮಂಡ್ಯದಲ್ಲಿ ಕೈಗಾರಿಕೆ:ಕುಮಾರಸ್ವಾಮಿ ಪ್ರಯತ್ನಕ್ಕೆ ಆರಂಭದಲ್ಲೆ ವಿಫ್ನ.ಸುಳ್ಳು ಹೇಳಿತೆ ರಾಜ್ಯ ಸರಕಾರ!

# ರೈತರ ಒಪ್ಪಿಗೆ, ಸೂಕ್ತ ಪರಿಹಾರ, ಜೀವನ ಭದ್ರತೆ ಹಾಗೂ ಉದ್ಯೋಗದ ಖಾತರಿ ನೀಡಿ ARAI ಯೋಜನೆ ಮುಂದುವರಿಸಿ: ಮಹಾಲಿಂಗೇಗೌಡ ಮುದ್ದನಘಟ್ಟ

**ನಮ್ಮ ಕುಟುಂಬ ಕೃಷಿ ಮಾಡುತ್ತಿರುವ 20ರಿಂದ 25 ಎಕರೆ ಭೂಮಿಯನ್ನೂ ಪರಿಹಾರ ಪಡೆಯದೆ ಬಿಟ್ಟುಕೊಡಲು ಸಿದ್ಧ; ಆದರೆ ರೈತರ ಹಿತಾಸಕ್ತಿ ಕಡೆಗಣಿಸಬಾರದು**

**ಮಂಡ್ಯ, ನ.3:** ಮಂಡ್ಯ ಜಿಲ್ಲೆಯಲ್ಲಿ ಆಟೋಮೋಟಿವ್ ರಿಸರ್ಚ್ ಅಸೋಸಿಯೇಷನ್ ಆಫ್ ಇಂಡಿಯಾ (ARAI) ವತಿಯಿಂದ ಸ್ಥಾಪಿಸಲು ಉದ್ದೇಶಿಸಿರುವ ನಿರ್ಮಾಣ ಮತ್ತು ಮೂಲಸೌಕರ್ಯ ಉಪಕರಣಗಳ ಪರೀಕ್ಷಾ ಕೇಂದ್ರ ಹಾಗೂ ಎಲೆಕ್ಟ್ರಿಕ್ ವಾಹನ ಪರೀಕ್ಷಾ ಕೇಂದ್ರಗಳ ಯೋಜನೆಯನ್ನು ಸ್ವಾಗತಿಸುವುದಾಗಿ ಮಾಜಿ ಬಸಾರಾಳು ಪಂಚಾಯತ್ ಅಧ್ಯಕ್ಷ ಮಹಾಲಿಂಗೇಗೌಡ ಮುದ್ದನಘಟ್ಟ ತಿಳಿಸಿದ್ದಾರೆ.

ಆದರೆ ಯೋಜನೆಗಾಗಿ ಗುರುತಿಸಿರುವ ಭೂಮಿಯನ್ನು ಅವಲಂಬಿಸಿ ಜೀವನ ನಡೆಸುತ್ತಿರುವ ರೈತ ಕುಟುಂಬಗಳ ಒಪ್ಪಿಗೆ ಪಡೆಯಬೇಕು. ಅವರಿಗೆ ಸೂಕ್ತ ಪರಿಹಾರ, ಜೀವನ ಭದ್ರತೆ ಹಾಗೂ ಕುಟುಂಬದ ಸದಸ್ಯರಿಗೆ ಉದ್ಯೋಗದ ಖಾತರಿ ನೀಡಿದ ನಂತರವೇ ಯೋಜನೆಯನ್ನು ಮುಂದುವರಿಸಬೇಕು ಎಂದು ಅವರು ಒತ್ತಾಯಿಸಿದ್ದಾರೆ.

ನವೆಂಬರ್ 3ರಂದು ಪತ್ರಿಕಾ ಗೋಷ್ಠಿಯ ವಿವರಗಳನ್ನು ಬಿಡುಗಡೆ ಮಾಡಿರುವ ಅವರು, ಮಂಡ್ಯ ಜಿಲ್ಲಾಧಿಕಾರಿಗಳು ಕಂದಾಯ ಇಲಾಖೆಯ ಸರ್ಕಾರದ ಅಪರ ಮುಖ್ಯ ಕಾರ್ಯದರ್ಶಿಗಳಿಗೆ ಅಕ್ಟೋಬರ್ 28ರಂದು ಬರೆದಿರುವ ಪತ್ರದಲ್ಲಿ ಪ್ರಸ್ತಾಪಿತ ಭೂಮಿಯ ಕುರಿತು ಅಪೂರ್ಣ ಹಾಗೂ ವಾಸ್ತವಕ್ಕೆ ಭಿನ್ನವಾದ ಮಾಹಿತಿ ದಾಖಲಾಗಿರುವ ಬಗ್ಗೆ ಆಕ್ಷೇಪ ವ್ಯಕ್ತಪಡಿಸಿದ್ದಾರೆ.

ಜಿಲ್ಲಾಧಿಕಾರಿಗಳ ಪತ್ರದಲ್ಲಿ ಮುದ್ದನಘಟ್ಟ ಗ್ರಾಮದ ಸರ್ವೆ ನಂಬರ್ 48ರಲ್ಲಿ 70 ಎಕರೆ ಹಾಗೂ ಹೆಗ್ಗಡತಹಳ್ಳಿ ಗ್ರಾಮದ ಸರ್ವೆ ನಂಬರ್ 35ರಲ್ಲಿ 30 ಎಕರೆ ಸೇರಿ ಒಟ್ಟು 100 ಎಕರೆ ಸರ್ಕಾರಿ ಗೋಮಾಳವನ್ನು KIADBಗೆ ಮಂಜೂರು ಮಾಡಲು ಶಿಫಾರಸು ಮಾಡಲಾಗಿದೆ. ಈ ಭೂಮಿ ಖಾಲಿಯಾಗಿದ್ದು, ಒತ್ತುವರಿಯಿಂದ ಮುಕ್ತವಾಗಿದೆ, ಬೆಳೆಗಳು ಮತ್ತು ಮರಮಟ್ಟುಗಳಿಲ್ಲ ಹಾಗೂ ನಮೂನೆ 50, 53 ಮತ್ತು 57ರ ಅರ್ಜಿಗಳು ಬಾಕಿ ಇಲ್ಲ ಎಂದು ಉಲ್ಲೇಖಿಸಲಾಗಿದೆ. ಮುದ್ದನಘಟ್ಟಕ್ಕೆ ಸಂಬಂಧಿಸಿದ ಕೆಲವು ಅರ್ಜಿಗಳನ್ನು ಅನರ್ಹತೆಯ ಆಧಾರದಲ್ಲಿ ತಿರಸ್ಕರಿಸಲಾಗಿದೆ ಎಂದೂ ವರದಿಯಲ್ಲಿ ತಿಳಿಸಲಾಗಿದೆ ಎಂದು ಅವರು ವಿವರಿಸಿದ್ದಾರೆ.

ಆದರೆ ವಾಸ್ತವದಲ್ಲಿ ಈ ಪ್ರದೇಶದಲ್ಲಿ ಸರ್ಕಾರದಿಂದ ಭೂಮಿ ಮಂಜೂರಾತಿ ಪಡೆದಿರುವ ಹಿಡುವಳಿದಾರರು, ಮನೆ ನಿರ್ಮಿಸಿಕೊಂಡು ವಾಸಿಸುತ್ತಿರುವ ಕುಟುಂಬಗಳು ಹಾಗೂ ನಮೂನೆ 50, 53 ಮತ್ತು 57ರಲ್ಲಿ ಅರ್ಜಿ ಸಲ್ಲಿಸಿ ಹಲವು ವರ್ಷಗಳಿಂದ ಕೃಷಿ ಮಾಡಿಕೊಂಡು ಬರುತ್ತಿರುವವರು ಇದ್ದಾರೆ. ಹೀಗಿರುವಾಗ ಸಂಪೂರ್ಣ ಪ್ರದೇಶವನ್ನು ಖಾಲಿ ಗೋಮಾಳವೆಂದು ಬಿಂಬಿಸಿರುವುದು ಸರಿಯಲ್ಲ ಎಂದು ಆಕ್ಷೇಪಿಸಿದ್ದಾರೆ.

ಮುದ್ದನಘಟ್ಟ, ಹೆಗ್ಗಡತಹಳ್ಳಿ, ನರಗಲು ಹಾಗೂ ವಡ್ಡರಹಳ್ಳಿ ಗ್ರಾಮಗಳ ನೂರಾರು ಕುಟುಂಬಗಳು ಈ ಪ್ರದೇಶದಲ್ಲಿ ಕೃಷಿ ಮಾಡಿಕೊಂಡು ಜೀವನ ಸಾಗಿಸುತ್ತಿವೆ. ಸುಮಾರು 80ರಿಂದ 100ಕ್ಕೂ ಹೆಚ್ಚು ಕುಟುಂಬಗಳು ಕೃಷಿಯನ್ನು ಅವಲಂಬಿಸಿದ್ದು, ಕೆಲವು ಕುಟುಂಬಗಳು 40ರಿಂದ 50 ವರ್ಷಗಳಿಂದ ಹಾಗೂ ಇನ್ನು ಕೆಲವು ಕುಟುಂಬಗಳು ತಮ್ಮ ಹಿರಿಯರ ಕಾಲದಿಂದ 60ರಿಂದ 80 ವರ್ಷಗಳಿಂದ ಕೃಷಿ ಮಾಡುತ್ತಿವೆ. ಪರಿಶಿಷ್ಟ ಸಮುದಾಯದ ಸುಮಾರು 10ರಿಂದ 15 ಕುಟುಂಬಗಳೂ ಸೇರಿದಂತೆ ಬಡವರು, ಹಿಂದುಳಿದವರು ಹಾಗೂ ಆರ್ಥಿಕವಾಗಿ ದುರ್ಬಲ ಕುಟುಂಬಗಳು ಇಲ್ಲಿ ಕೃಷಿ ಅವಲಂಬಿಸಿವೆ ಎಂದು ತಿಳಿಸಿದ್ದಾರೆ.

ಮೂಲತಃ ಮಳೆ ಆಶ್ರಿತ ಒಣಭೂಮಿಯಾಗಿರುವ ಪ್ರದೇಶದಲ್ಲಿ ರೈತರು ಸ್ವಂತ ಹಣ ಮತ್ತು ಶ್ರಮದಿಂದ ಕೊಳವೆಬಾವಿಗಳನ್ನು ಕೊರೆಸಿ ತೆಂಗು, ಅಡಿಕೆ, ಕಬ್ಬು, ರಾಗಿ, ಹುರುಳಿ ಹಾಗೂ ತರಕಾರಿ ಬೆಳೆಗಳನ್ನು ಬೆಳೆಯುತ್ತಿದ್ದಾರೆ. ಹೀಗಾಗಿ ಬೆಳೆಗಳು, ಮರಗಳು, ಕೊಳವೆಬಾವಿಗಳು, ಮನೆಗಳು ಹಾಗೂ ರೈತರು ಮಾಡಿರುವ ಹೂಡಿಕೆಗಳನ್ನು ಅಧಿಕಾರಿಗಳು ಸ್ಥಳದಲ್ಲಿಯೇ ಪರಿಶೀಲಿಸಿ ದಾಖಲಿಸಬೇಕು ಎಂದು ಆಗ್ರಹಿಸಿದ್ದಾರೆ.

**ರೈತರ ಸಮ್ಮುಖದಲ್ಲಿ ಜಂಟಿ ಪರಿಶೀಲನೆಗೆ ಆಗ್ರಹ**

ಕಂದಾಯ ಇಲಾಖೆ, ಭೂಮಾಪನ ಇಲಾಖೆ, KIADB ಹಾಗೂ ARAI ಅಧಿಕಾರಿಗಳು ಮತ್ತು ರೈತರ ಸಮ್ಮುಖದಲ್ಲಿ ಜಂಟಿ ಸ್ಥಳ ಪರಿಶೀಲನೆ ನಡೆಸಬೇಕು. ಪ್ರಸ್ತಾವಿತ 100 ಎಕರೆ ಭೂಮಿಯ ಗಡಿಯನ್ನು ಗುರುತಿಸಿ, ಅದರೊಳಗೆ ಮಂಜೂರಾತಿ ಪಡೆದವರ ಜಮೀನು, ಮನೆಗಳು, ಸಾಗುವಳಿ, ಬೆಳೆಗಳು ಮತ್ತು ಇತರ ಹೂಡಿಕೆಗಳ ವಿವರಗಳನ್ನು ದಾಖಲಿಸಬೇಕು. ಜಿಲ್ಲಾಧಿಕಾರಿಗಳ ವರದಿಯಲ್ಲಿ ತಪ್ಪು ಅಥವಾ ಅಪೂರ್ಣ ಮಾಹಿತಿ ಇದ್ದರೆ ಪರಿಷ್ಕೃತ ವರದಿಯನ್ನು ಸರ್ಕಾರಕ್ಕೆ ಸಲ್ಲಿಸಬೇಕು ಎಂದು ಒತ್ತಾಯಿಸಿದ್ದಾರೆ.

ಅರ್ಜಿಗಳನ್ನು ತಿರಸ್ಕರಿಸಿದ್ದರೆ ಯಾವ ರೈತರ ಅರ್ಜಿಯನ್ನು ಯಾವ ದಿನಾಂಕದಂದು, ಯಾವ ಕಾರಣಕ್ಕಾಗಿ ತಿರಸ್ಕರಿಸಲಾಗಿದೆ ಎಂಬುದನ್ನು ಬಹಿರಂಗಪಡಿಸಿ, ಸಂಬಂಧಪಟ್ಟ ಆದೇಶಗಳ ಪ್ರತಿಗಳನ್ನು ಅರ್ಜಿದಾರರಿಗೆ ನೀಡಬೇಕು. ಅರ್ಜಿಗಳ ಇತ್ಯರ್ಥದ ಕುರಿತು ಜಿಲ್ಲಾಡಳಿತದ ವರದಿ ಮತ್ತು ರೈತರ ಅಹವಾಲುಗಳ ನಡುವಿನ ವ್ಯತ್ಯಾಸವನ್ನು ದಾಖಲೆಗಳ ಆಧಾರದಲ್ಲಿ ಬಗೆಹರಿಸಬೇಕು ಎಂದು ಹೇಳಿದ್ದಾರೆ.

ಮೊದಲು ಸಂಬಂಧಪಟ್ಟ ಎಲ್ಲ ರೈತರ ಸಭೆ ಕರೆದು ಯೋಜನೆಯ ಉದ್ದೇಶ, ಅಗತ್ಯವಿರುವ ಭೂಮಿಯ ಪ್ರಮಾಣ, ಗುರುತಿಸಿರುವ ಪ್ರದೇಶದ ನಕ್ಷೆ ಹಾಗೂ ಭೂಮಿ ಹಸ್ತಾಂತರದ ಪ್ರಕ್ರಿಯೆಯನ್ನು ಸ್ಪಷ್ಟಪಡಿಸಬೇಕು. ರೈತರ ಅಹವಾಲುಗಳನ್ನು ಲಿಖಿತವಾಗಿ ಸ್ವೀಕರಿಸಿ, ಅವರೊಂದಿಗೆ ಚರ್ಚಿಸಿದ ನಂತರವೇ ಮುಂದಿನ ಕ್ರಮ ಕೈಗೊಳ್ಳಬೇಕು ಎಂದು ಆಗ್ರಹಿಸಿದ್ದಾರೆ.

**ನಮ್ಮ ಕುಟುಂಬದ 20ರಿಂದ 25 ಎಕರೆ ಭೂಮಿ ಬಿಟ್ಟುಕೊಡಲು ಸಿದ್ಧ**

ಕೇಂದ್ರ ಸಚಿವ ಎಚ್.ಡಿ. ಕುಮಾರಸ್ವಾಮಿ ಅವರ ಉದ್ಯೋಗ ಸೃಷ್ಟಿಯ ದೂರದೃಷ್ಟಿ ಹಾಗೂ ರೈತಪರ ಕಾಳಜಿಯ ನಿಲುವಿಗೆ ತಮ್ಮ ಬೆಂಬಲವಿದೆ ಎಂದು ತಿಳಿಸಿರುವ ಮಹಾಲಿಂಗೇಗೌಡ, ಮಂಡ್ಯದ ಯುವಜನರಿಗೆ ಉದ್ಯೋಗಾವಕಾಶಗಳು ಸೃಷ್ಟಿಯಾಗಬೇಕು ಎಂಬುದು ತಮ್ಮ ಆಶಯವಾಗಿದೆ ಎಂದಿದ್ದಾರೆ.

ರೈತರಿಗೆ ನ್ಯಾಯಯುತ ಪರಿಹಾರ, ಜೀವನ ಭದ್ರತೆ ಹಾಗೂ ಕುಟುಂಬದ ಸದಸ್ಯರಿಗೆ ಅರ್ಹತೆಗೆ ತಕ್ಕ ಉದ್ಯೋಗದ ಖಾತರಿ ನೀಡುವುದಾದರೆ ತಮ್ಮ ಕುಟುಂಬ ಕೃಷಿ ಮಾಡಿಕೊಂಡು ಬರುತ್ತಿರುವ ಸುಮಾರು 20ರಿಂದ 25 ಎಕರೆ ಭೂಮಿಯನ್ನೂ ಯಾವುದೇ ಪರಿಹಾರ ಪಡೆಯದೆ ಯೋಜನೆಗಾಗಿ ಬಿಟ್ಟುಕೊಡಲು ಸಿದ್ಧವಿದೆ ಎಂದು ಘೋಷಿಸಿದ್ದಾರೆ.

ಆದರೆ ಇದು ತಮ್ಮ ವೈಯಕ್ತಿಕ ಹಾಗೂ ಕುಟುಂಬದ ನಿಲುವಾಗಿದ್ದು, ಮೂರ್ನಾಲ್ಕು ಗ್ರಾಮಗಳ ರೈತರ ಪರವಾಗಿ ತಾವು ಒಪ್ಪಿಗೆ ನೀಡುತ್ತಿಲ್ಲ. ಪ್ರತಿಯೊಂದು ಕುಟುಂಬದ ಅಭಿಪ್ರಾಯ, ಅಹವಾಲು ಮತ್ತು ಒಪ್ಪಿಗೆಯನ್ನು ಪ್ರತ್ಯೇಕವಾಗಿ ಪಡೆಯಬೇಕು ಎಂದು ಸ್ಪಷ್ಟಪಡಿಸಿದ್ದಾರೆ.

ಯೋಜನೆಗೆ ಭೂಮಿ ನೀಡುವ ರೈತರ ಕುಟುಂಬಗಳ ಮುಂದಿನ ಜೀವನೋಪಾಯಕ್ಕೆ ಭದ್ರತೆ ಕಲ್ಪಿಸಬೇಕು. ಕುಟುಂಬದ ಸದಸ್ಯರಿಗೆ ಕೌಶಲ್ಯ ತರಬೇತಿ ನೀಡಿ, ಅರ್ಹತೆಗೆ ಅನುಗುಣವಾಗಿ ಉದ್ಯೋಗ ಒದಗಿಸುವ ಕುರಿತು ಸರ್ಕಾರ, ಜಿಲ್ಲಾಡಳಿತ, KIADB ಹಾಗೂ ARAI ಸಂಸ್ಥೆಗಳು ಲಿಖಿತ ಖಾತರಿ ನೀಡಬೇಕು. ಅನ್ವಯಿಸುವ ಕಾನೂನಿನಡಿ ಸೂಕ್ತ ಪರಿಹಾರ ಮತ್ತು ಪುನರ್ವಸತಿ ಸೌಲಭ್ಯಗಳನ್ನೂ ಕಲ್ಪಿಸಬೇಕು ಎಂದು ಒತ್ತಾಯಿಸಿದ್ದಾರೆ.

ರಾಜಕೀಯ ಮೇಲಾಟಗಳನ್ನು ಬದಿಗಿಟ್ಟು ಜಿಲ್ಲೆಯ ಅಭಿವೃದ್ಧಿ ಮತ್ತು ರೈತರ ಹಿತಾಸಕ್ತಿಗೆ ಎಲ್ಲ ರಾಜಕೀಯ ನಾಯಕರು ಬದ್ಧತೆ ತೋರಬೇಕು. ಕೇಂದ್ರ ಮತ್ತು ರಾಜ್ಯ ಸರ್ಕಾರಗಳು, ಜಿಲ್ಲಾಡಳಿತ, KIADB ಹಾಗೂ ARAI ಸಂಸ್ಥೆಗಳು ಸಮನ್ವಯದಿಂದ ಕಾರ್ಯನಿರ್ವಹಿಸಿ ರೈತರ ವಿಶ್ವಾಸ ಗಳಿಸಬೇಕು. ದಾಖಲೆಗಳಲ್ಲಿನ ವ್ಯತ್ಯಾಸಗಳನ್ನು ಸರಿಪಡಿಸಿ, ರೈತರಿಗೆ ನ್ಯಾಯ ಮತ್ತು ಭದ್ರತೆ ಒದಗಿಸುವ ನಿರ್ಧಾರವನ್ನು ಕಾಲಮಿತಿಯೊಳಗೆ ಕೈಗೊಳ್ಳಬೇಕು ಎಂದು ಮಹಾಲಿಂಗೇಗೌಡ ಮುದ್ದನಘಟ್ಟ ಆಗ್ರಹಿಸಿದ್ದಾರೆ.