# ನಿಯಂತ್ರಣಾತ್ಮಕ ತಪಾಸಣೆಗಳಿಗೆ ಖಾಸಗಿ ಸಂಸ್ಥೆಗಳ ನೆರವು ಪಡೆಯಲು ಸರ್ಕಾರದ ಸೂಚನೆ
## ತಪಾಸಣೆ ವಿಳಂಬ ತಪ್ಪಿಸಲು ಮೂರನೇ ವ್ಯಕ್ತಿ ಏಜೆನ್ಸಿಗಳ ನೇಮಕಕ್ಕೆ ಕ್ರಮ; ಇಲಾಖೆಗಳ ಮುಖ್ಯಸ್ಥರಿಗೆ ಕಾಲಮಿತಿಯ ಕ್ರಿಯಾ ಯೋಜನೆ ಸಲ್ಲಿಸಲು ಸೂಚನೆ
**ಬೆಂಗಳೂರು, ಅ.22:** ರಾಜ್ಯದ ವಿವಿಧ ಸರ್ಕಾರಿ ಇಲಾಖೆಗಳಲ್ಲಿ ಸಿಬ್ಬಂದಿ ಕೊರತೆಯಿಂದಾಗಿ ನಿಯಂತ್ರಣಾತ್ಮಕ ತಪಾಸಣೆ, ಪರಿಶೀಲನೆ ಮತ್ತು ಪ್ರಮಾಣೀಕರಣ ಕಾರ್ಯಗಳು ವಿಳಂಬವಾಗುತ್ತಿರುವ ಹಿನ್ನೆಲೆಯಲ್ಲಿ, ಅರ್ಹ ಖಾಸಗಿ ಮೂರನೇ ವ್ಯಕ್ತಿ ಸಂಸ್ಥೆಗಳ ಸೇವೆ ಪಡೆಯಲು ಅಗತ್ಯ ಕ್ರಮ ಕೈಗೊಳ್ಳುವಂತೆ ರಾಜ್ಯ ಸರ್ಕಾರ ಸೂಚಿಸಿದೆ.
ಈ ಸಂಬಂಧ ಪ್ರಜಾ ಸೇವಾ ಇಲಾಖೆಯ ಸರ್ಕಾರದ ಪ್ರಧಾನ ಕಾರ್ಯದರ್ಶಿ ಹರ್ಷ್ ಗುಪ್ತ ಅವರು 2026ರ ಅಕ್ಟೋಬರ್ 19ರಂದು ಆದೇಶ ಹೊರಡಿಸಿದ್ದು, ಕಾರ್ಖಾನೆಗಳು, ಬಾಯ್ಲರ್‌ಗಳು, ಆಹಾರ ಸುರಕ್ಷತೆ ಮತ್ತು ಔಷಧ ನಿಯಂತ್ರಣ ಸೇರಿದಂತೆ ವಿವಿಧ ಕ್ಷೇತ್ರಗಳ ತಪಾಸಣಾ ವ್ಯವಸ್ಥೆಯನ್ನು ಬಲಪಡಿಸಲು ಇಲಾಖೆಗಳ ಮುಖ್ಯಸ್ಥರಿಗೆ ನಿರ್ದೇಶನ ನೀಡಿದ್ದಾರೆ.
ಸರ್ಕಾರದ ಮುಖ್ಯ ಕಾರ್ಯದರ್ಶಿಯವರ ಅನುಮೋದನೆಯೊಂದಿಗೆ 2026ರ ಆಗಸ್ಟ್ 24ರಂದು ಹೊರಡಿಸಿರುವ ಸರ್ಕಾರಿ ಆದೇಶದ ಅಂಶ ಸಂಖ್ಯೆ 3ರ ಅನುಷ್ಠಾನಕ್ಕೆ ಸಂಬಂಧಿಸಿದಂತೆ ಈ ಸೂಚನೆ ನೀಡಲಾಗಿದೆ.
*ಯಾವೆಲ್ಲ ತಪಾಸಣೆಗಳಿಗೆ ಅನ್ವಯ?*
ಕಾನೂನು ಮಾಪನಶಾಸ್ತ್ರ ಇಲಾಖೆಯಿಂದ ತೂಕ ಮತ್ತು ಅಳತೆ ಸಾಧನಗಳ ವಾರ್ಷಿಕ ಪರಿಶೀಲನೆ ಹಾಗೂ ಪ್ರಮಾಣೀಕರಣ, ಆಹಾರ ಸುರಕ್ಷತಾ ಇಲಾಖೆಯಿಂದ ಆಹಾರ ವಹಿವಾಟು ಸಂಸ್ಥೆಗಳ ತಪಾಸಣೆ, ಔಷಧ ನಿಯಂತ್ರಣ ಇಲಾಖೆಯಿಂದ ಔಷಧ ಮಾರಾಟ ಮಳಿಗೆಗಳ ಪರಿಶೀಲನೆ ಹಾಗೂ ಕಾರ್ಖಾನೆಗಳು ಮತ್ತು ಬಾಯ್ಲರ್‌ಗಳ ವಾರ್ಷಿಕ ತಪಾಸಣೆ ಮತ್ತು ಪ್ರಮಾಣೀಕರಣ ಕಾರ್ಯಗಳಿಗೆ ಈ ಕ್ರಮ ಅನ್ವಯವಾಗಲಿದೆ.
ಸಾಕಷ್ಟು ಕ್ಷೇತ್ರ ಸಿಬ್ಬಂದಿ ಲಭ್ಯವಿಲ್ಲದ ಕಾರಣ ಇಂತಹ ತಪಾಸಣೆಗಳು ವಿಳಂಬವಾಗುತ್ತಿದ್ದು, ನಿಗದಿತ ಅವಧಿಯಲ್ಲಿ ಪರಿಶೀಲನೆ ನಡೆಸಲು ಸಾಧ್ಯವಾಗುತ್ತಿಲ್ಲ ಎಂದು ಸರ್ಕಾರದ ಪತ್ರದಲ್ಲಿ ಉಲ್ಲೇಖಿಸಲಾಗಿದೆ.
*ಅಧಿಕಾರಿಗಳ ಶಾಸನಬದ್ಧ ಅಧಿಕಾರ ಉಳಿಯಲಿದೆ*
ವಾರ್ಷಿಕ ಅಥವಾ ನಿಯತಕಾಲಿಕ ತಪಾಸಣೆ ಕಡ್ಡಾಯವಾಗಿರುವ ಕಡೆಗಳಲ್ಲಿ, ಅರ್ಹ ಮತ್ತು ವಿಶ್ವಾಸಾರ್ಹ ಮೂರನೇ ವ್ಯಕ್ತಿ ಸಂಸ್ಥೆಗಳನ್ನು ಗುರುತಿಸಿ ಪಟ್ಟಿಗೆ ಸೇರಿಸಿಕೊಳ್ಳಲು ಸೂಚಿಸಲಾಗಿದೆ. ಸಂಬಂಧಿತ ಕಾನೂನುಗಳು ಅನುಮತಿಸುವ ಮಿತಿಯಲ್ಲಿ ಈ ಸಂಸ್ಥೆಗಳಿಂದ ತಪಾಸಣೆ, ಪರೀಕ್ಷೆ, ಪರಿಶೀಲನೆ ಅಥವಾ ಅನುಸರಣೆ ಲೆಕ್ಕಪರಿಶೋಧನೆ ನಡೆಸಿಸಬಹುದಾಗಿದೆ.
ಆದರೆ ತಪಾಸಣೆ ನಡೆಸುವ ಶಾಸನಬದ್ಧ ಅಧಿಕಾರ, ಮಾದರಿ ಸಂಗ್ರಹಣೆ, ವಶಪಡಿಸಿಕೊಳ್ಳುವಿಕೆ ಮತ್ತು ಕಾನೂನು ಕ್ರಮ ಜರುಗಿಸುವ ಅಧಿಕಾರಗಳು ಇಲಾಖೆಯ ಅಧಿಕಾರಿಗಳಲ್ಲಿಯೇ ಮುಂದುವರಿಯಲಿವೆ. ಮೂರನೇ ವ್ಯಕ್ತಿ ಸಂಸ್ಥೆಗಳ ವರದಿಗಳ ಆಧಾರದ ಮೇಲೆ ಅಪಾಯ ಆಧಾರಿತ ಮತ್ತು ಗುರಿನಿರ್ದಿಷ್ಟ ತಪಾಸಣೆಗಳಿಗೆ ಆದ್ಯತೆ ನೀಡಲು ಇಲಾಖೆಗಳು ಕ್ರಮ ಕೈಗೊಳ್ಳಬೇಕಿದೆ.
ನಿಯಮಗಳಲ್ಲಿ ನಿಯತಕಾಲಿಕ ತಪಾಸಣೆ ಕಡ್ಡಾಯಗೊಳಿಸದ ಕ್ಷೇತ್ರಗಳಲ್ಲಿಯೂ ಉತ್ತಮ ಆಡಳಿತ ಕ್ರಮವಾಗಿ ನಿಯತಕಾಲಿಕ ಮೂರನೇ ವ್ಯಕ್ತಿ ಪರಿಶೀಲನೆಯನ್ನು ಜಾರಿಗೊಳಿಸುವ ಸಾಧ್ಯತೆಯನ್ನು ಪರಿಶೀಲಿಸುವಂತೆ ಸೂಚಿಸಲಾಗಿದೆ.
*ಅರ್ಹತಾ ಮಾನದಂಡ ಮತ್ತು ಮೇಲ್ವಿಚಾರಣೆಗೆ ನಿರ್ದೇಶನ*
ಮೂರನೇ ವ್ಯಕ್ತಿ ಸಂಸ್ಥೆಗಳನ್ನು ನೇಮಿಸಲು ಅರ್ಹತಾ ಮಾನದಂಡಗಳು, ಮಾನ್ಯತೆ ಅಗತ್ಯತೆಗಳು, ಶುಲ್ಕದ ರಚನೆ ಮತ್ತು ನೇಮಕಾತಿಯ ಷರತ್ತುಗಳನ್ನು ರೂಪಿಸಿ ಸಂಸ್ಥೆಗಳನ್ನು ಪಟ್ಟಿಗೆ ಸೇರಿಸಿಕೊಳ್ಳಬೇಕು. ಈ ವ್ಯವಸ್ಥೆ ಜಾರಿಗೆ ಅಗತ್ಯವಿರುವ ರಾಜ್ಯದ ನಿಯಮಗಳು, ಅಧಿಸೂಚನೆಗಳು ಮತ್ತು ಕಾರ್ಯವಿಧಾನಗಳಲ್ಲಿನ ಬದಲಾವಣೆಗಳನ್ನೂ ಪರಿಶೀಲಿಸಬೇಕು ಎಂದು ಆದೇಶದಲ್ಲಿ ತಿಳಿಸಲಾಗಿದೆ.
ಇದಲ್ಲದೆ, ನೇಮಕಗೊಂಡ ಸಂಸ್ಥೆಗಳ ಕಾರ್ಯದ ಮೇಲೆ ಇಲಾಖಾ ಮೇಲ್ವಿಚಾರಣಾ ವ್ಯವಸ್ಥೆ ರೂಪಿಸಬೇಕು. ಅವುಗಳ ಕೆಲಸವನ್ನು ಯಾದೃಚ್ಛಿಕವಾಗಿ ಪರಿಶೀಲಿಸುವುದರ ಜೊತೆಗೆ ಲೋಪಗಳು ಕಂಡುಬಂದಲ್ಲಿ ಸಂಬಂಧಿತ ಸಂಸ್ಥೆಗಳ ವಿರುದ್ಧ ಕ್ರಮ ಕೈಗೊಳ್ಳಬೇಕು. ಕೈಗೊಳ್ಳುವ ಕ್ರಮಗಳ ವಿವರ ಮತ್ತು ಕಾಲಮಿತಿಯುಳ್ಳ ಕ್ರಿಯಾ ಯೋಜನೆಯನ್ನು ಪ್ರಜಾ ಸೇವಾ ಇಲಾಖೆಗೆ ಸಲ್ಲಿಸುವಂತೆಯೂ ಸೂಚಿಸಲಾಗಿದೆ.
*ಮುಖ್ಯ ಕಾರ್ಯದರ್ಶಿ ಮಟ್ಟದಲ್ಲಿ ಪರಿಶೀಲನೆ*
ಈ ವಿಷಯವನ್ನು ಕರ್ನಾಟಕ ಸರ್ಕಾರದ ಮುಖ್ಯ ಕಾರ್ಯದರ್ಶಿಗಳ ಅಧ್ಯಕ್ಷತೆಯಲ್ಲಿ ನಡೆಯುವ ಕೆಡಿಪಿ (KDP) ಪರಿಶೀಲನಾ ಸಭೆಯ ಕಾರ್ಯಸೂಚಿಯ ಭಾಗವಾಗಿಯೂ ಸೇರಿಸಲಾಗುವುದು ಎಂದು ಆದೇಶದಲ್ಲಿ ತಿಳಿಸಲಾಗಿದೆ. ಸಂಬಂಧಿಸಿದ ಇಲಾಖೆಗಳು ತಮ್ಮ ವ್ಯಾಪ್ತಿಯಲ್ಲಿ ಇದೇ ರೀತಿಯ ಕ್ರಮಗಳನ್ನು ಕೈಗೊಂಡು ಪ್ರಗತಿಯ ಮಾಹಿತಿಯನ್ನು ಸಲ್ಲಿಸಬೇಕಿದೆ.
ಸರ್ಕಾರದ ಈ ನಿರ್ದೇಶನವು ಸಿಬ್ಬಂದಿ ಕೊರತೆಯಿಂದ ತಪಾಸಣೆಗಳು ಬಾಕಿ ಉಳಿಯುವ ಸಮಸ್ಯೆಯನ್ನು ನಿವಾರಿಸುವ ಉದ್ದೇಶ ಹೊಂದಿದ್ದರೂ, ಖಾಸಗಿ ಸಂಸ್ಥೆಗಳ ಆಯ್ಕೆ, ಪಾರದರ್ಶಕ ನೇಮಕಾತಿ, ಶುಲ್ಕ ನಿಗದಿ ಮತ್ತು ಕಾರ್ಯದ ಗುಣಮಟ್ಟದ ಮೇಲ್ವಿಚಾರಣೆ ಪರಿಣಾಮಕಾರಿಯಾಗಿ ನಡೆಯುವುದು ಅದರ ಯಶಸ್ಸಿಗೆ ನಿರ್ಣಾಯಕವಾಗಲಿದೆ.
