Wednesday, November 18, 2026
spot_img

ಚಾಮ್ಸ್ ಶುಗರ್ ಕಾರ್ಖಾನೆಯಲ್ಲಿ ಕಾರ್ಮಿಕ ಸಾವು.ಕೊಲೆ ಶಂಕೆ:೨೨ ಲಕ್ಷ ಪರಿಹಾರ ವಿತರಣೆ

**ಚಾಮುಂಡೇಶ್ವರಿ ಸಕ್ಕರೆ ಕಾರ್ಖಾನೆಯಲ್ಲಿ ಯುವಕನ ಸಾವು: ಕೊಲೆ ಆರೋಪ, ಶವ ಇಟ್ಟು ಪ್ರತಿಭಟನೆ**

**ಕುಟುಂಬಕ್ಕೆ ₹22 ಲಕ್ಷ ಪರಿಹಾರ; ಸಾವಿನ ನೈಜ ಕಾರಣ ಬಹಿರಂಗಕ್ಕೆ ಆಗ್ರಹ**

ಮಂಡ್ಯ: ಮದ್ದೂರು ತಾಲ್ಲೂಕಿನ ಚಾಮುಂಡೇಶ್ವರಿ ಸಕ್ಕರೆ ಕಾರ್ಖಾನೆಯಲ್ಲಿ 23 ವರ್ಷದ ಯುವಕ ಅರುಣ್ ಮೃತಪಟ್ಟಿರುವ ಪ್ರಕರಣ ಅನುಮಾನಗಳಿಗೆ ಕಾರಣವಾಗಿದೆ. ಇದು ಕೊಲೆ ಎಂದು ಆರೋಪಿಸಿದ ಕುಟುಂಬದವರು ಕಾರ್ಖಾನೆಯ ಮುಖ್ಯ ಗೇಟ್ ಎದುರು ಮೃತದೇಹ ಇಟ್ಟು ಪ್ರತಿಭಟನೆ ನಡೆಸಿದರು.

ಕುಟುಂಬದವರು ಹಾಗೂ ಸ್ಥಳೀಯರ ಪ್ರಕಾರ, ಅರುಣ್ ಹಿಂದಿನ ದಿನವೇ ಕಾರ್ಖಾನೆಯಲ್ಲಿ ಮೃತಪಟ್ಟಿದ್ದರು ಎನ್ನಲಾಗಿದೆ. ಬಳಿಕ ಅವರನ್ನು ಖಾಸಗಿ ಆಸ್ಪತ್ರೆಗೆ ಕರೆದೊಯ್ಯಲಾಗಿದ್ದು, ಅಲ್ಲಿ ಹೃದಯಾಘಾತವಾಗಿದೆ ಎಂದು ತಿಳಿಸಲಾಗಿದೆ. ನಂತರ ಖಾಸಗಿ ಆಂಬುಲೆನ್ಸ್‌ನಲ್ಲಿ ಮೃತದೇಹವನ್ನು ಸ್ವಗ್ರಾಮಕ್ಕೆ ಕಳುಹಿಸಲಾಗಿದೆ. ಆಂಬುಲೆನ್ಸ್ ಚಾಲಕ ₹5,000 ನೀಡಲೇಬೇಕೆಂದು ವಾಗ್ವಾದ ನಡೆಸಿ ಹಣ ಪಡೆದು ಹೋಗಿದ್ದಾನೆ ಎಂಬ ಆರೋಪವೂ ಕೇಳಿಬಂದಿದೆ. ಸಾವನ್ನು ಸಹಜ ಸಾವು ಅಥವಾ ಹೃದಯಾಘಾತ ಎಂದು ಬಿಂಬಿಸಲಾಗುತ್ತಿದೆ ಎಂದು ಕುಟುಂಬದವರು ಅನುಮಾನ ವ್ಯಕ್ತಪಡಿಸಿದ್ದಾರೆ.

ಪ್ರಕರಣ ತಿಳಿದು ಸ್ಥಳಕ್ಕೆ ಭೇಟಿ ನೀಡಿದ ಕರ್ನಾಟಕ ರಾಷ್ಟ್ರ ಸಮಿತಿ (KRS) ಪಕ್ಷದ ಮುಖಂಡರು, ಕುಟುಂಬದಿಂದ ಮಾಹಿತಿ ಪಡೆದು ಪರಿಸ್ಥಿತಿ ಪರಿಶೀಲಿಸಿದರು. ಕುಟುಂಬದ ನಿರ್ಧಾರಕ್ಕೆ ಬೆಂಬಲ ಸೂಚಿಸಿ, ಪ್ರತಿಭಟನೆಯಲ್ಲಿ ಪಾಲ್ಗೊಂಡ ಅವರು, ನ್ಯಾಯ ಸಿಗುವವರೆಗೂ ಹೋರಾಟಕ್ಕೆ ಬೆಂಬಲ ನೀಡುವುದಾಗಿ ತಿಳಿಸಿದರು.

**₹22 ಲಕ್ಷ ಪರಿಹಾರ:** ಪ್ರತಿಭಟನೆಯ ನಡುವೆ ಮದ್ದೂರು ತಹಶೀಲ್ದಾರ್, ಡಿವೈಎಸ್‌ಪಿ ಮತ್ತು ಮದ್ದೂರು ಪೊಲೀಸ್ ಇನ್‌ಸ್ಪೆಕ್ಟರ್ ಅವರು ಮುಖಂಡರೊಂದಿಗೆ ಚರ್ಚೆ ನಡೆಸಿದರು. ಇದರ ಬಳಿಕ ಕುಟುಂಬಕ್ಕೆ ಹಿಂದಿನ ದಿನ ₹2 ಲಕ್ಷ ಹಾಗೂ ಇಂದು ₹20 ಲಕ್ಷ ಮೊತ್ತದ ಚೆಕ್ ವಿತರಿಸಲಾಗಿದ್ದು, ಒಟ್ಟು ₹22 ಲಕ್ಷ ಪರಿಹಾರ ನೀಡಿದಂತಾಗಿದೆ. ಆದರೆ ಪರಿಹಾರದ ಜತೆಗೆ ಸಾವಿನ ನೈಜ ಕಾರಣವೂ ಬಹಿರಂಗವಾಗಬೇಕು ಎಂಬುದು ಕುಟುಂಬದ ಪ್ರಮುಖ ಬೇಡಿಕೆಯಾಗಿದೆ.

**KRS ಪಕ್ಷದ ಆಗ್ರಹಗಳು:**
– ಅರುಣ್ ಸಾವಿನ ಬಗ್ಗೆ ನಿಷ್ಪಕ್ಷಪಾತ ತನಿಖೆ ನಡೆಸಬೇಕು.
– ವೈದ್ಯಕೀಯ ಹಾಗೂ ಮರಣೋತ್ತರ ಪರೀಕ್ಷೆಯ ವರದಿಗಳ ಮೂಲಕ ಸಾವಿನ ನೈಜ ಕಾರಣ ಬಹಿರಂಗಪಡಿಸಬೇಕು.
– ಕಾರ್ಖಾನೆಯ ಸಿಸಿಟಿವಿ ದೃಶ್ಯಾವಳಿ ಹಾಗೂ ದಾಖಲೆಗಳನ್ನು ಪರಿಶೀಲಿಸಬೇಕು.
– ತಪ್ಪಿತಸ್ಥರು ಯಾರೇ ಆಗಿದ್ದರೂ ಕಾನೂನು ಕ್ರಮ ಜರುಗಿಸಬೇಕು.
– ಮೃತ ಯುವಕನ ಕುಟುಂಬಕ್ಕೆ ನ್ಯಾಯ ಒದಗಿಸಬೇಕು.

ಪರಿಹಾರದಿಂದ ಕುಟುಂಬಕ್ಕೆ ತಾತ್ಕಾಲಿಕ ನೆರವು ಸಿಗಬಹುದಾದರೂ, ಯುವಕನ ಸಾವಿನ ಹಿಂದಿನ ಸತ್ಯ ಹೊರಬರುವುದು ಮತ್ತು ತಪ್ಪಿತಸ್ಥರ ವಿರುದ್ಧ ಕ್ರಮವಾಗುವುದು ಮುಖ್ಯ ಎಂದು ಪಕ್ಷದ ಮುಖಂಡರು ಹೇಳಿದರು.

ಪಕ್ಷದ ಮಂಡ್ಯ ಜಿಲ್ಲಾಧ್ಯಕ್ಷ ಮಲ್ಲೇಶ, ರಾಜ್ಯ ಘಟಕದ ಪ್ರಮೋದ್, ಜಿಲ್ಲಾ ಕಾರ್ಯದರ್ಶಿ ಮಾದೇಗೌಡ, ಮದ್ದೂರು ತಾಲ್ಲೂಕು ಅಧ್ಯಕ್ಷ ಮಹಾದೇವ, ಮಳವಳ್ಳಿ ಪ್ರಧಾನ ಕಾರ್ಯದರ್ಶಿ ಸತೀಶ, ಜಿಲ್ಲಾ ಕಾರ್ಯದರ್ಶಿ ಶಶಿಧರ್ ಸೇರಿದಂತೆ ಹಲವರು ಭಾಗವಹಿಸಿದ್ದರು.

Related Articles

LEAVE A REPLY

Please enter your comment!
Please enter your name here

Stay Connected

0FansLike
3,912FollowersFollow
0SubscribersSubscribe
- Advertisement -spot_img

Latest Articles

error: Content is protected !!