ಋತುತಾರೆ’ ಯೋಜನೆ ಜಾರಿ.ಆರೋಗ್ಯ ಸಚಿವರ ಕ್ರಮಕ್ಕೆ ಮಾಜಿ ಸಂಸದೆ ರಮ್ಯ ಶ್ಲಾಘನೆ

ಋತು ತಾರೆ”: ಮಧ್ಯವಯಸ್ಸಿನ ಮಹಿಳೆಯರ ಆರೋಗ್ಯಕ್ಕೆ ದೇಶದಲ್ಲೇ ಮೊದಲ ಸರ್ಕಾರಿ ಕಾರ್ಯಕ್ರಮ; ದಕ್ಷಿಣ ಕನ್ನಡದಲ್ಲಿ ಪೈಲಟ್ ಆರಂಭ, ರಮ್ಯಾ ಹರ್ಷ**

ಬೆಂಗಳೂರು:* ಋತುಬಂಧದ ಹಂತದಲ್ಲಿರುವ ಮಹಿಳೆಯರ ಆರೋಗ್ಯವನ್ನು ಸಾರ್ವಜನಿಕ ಆರೋಗ್ಯ ವ್ಯವಸ್ಥೆಯ ಭಾಗವಾಗಿಸುವ “ಋತು ತಾರೆ – ಕರ್ನಾಟಕ ರಾಜ್ಯ ಮಧ್ಯವಯಸ್ಸಿನ ಮಹಿಳಾ ಆರೋಗ್ಯ ಮತ್ತು ಋತುಬಂಧ ಕಾರ್ಯಕ್ರಮ”ದ ಅನುಷ್ಠಾನಕ್ಕೆ ಆರೋಗ್ಯ ಇಲಾಖೆ ಚಾಲನೆ ನೀಡಿದೆ. ಮೊದಲ ಹಂತದಲ್ಲಿ ದಕ್ಷಿಣ ಕನ್ನಡ ಜಿಲ್ಲೆಯಲ್ಲಿ ಮೂರು ತಿಂಗಳ ಪೈಲಟ್ ಯೋಜನೆ ನಡೆಯಲಿದೆ. ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಸೇವೆಗಳ ಆಯುಕ್ತರು ನವೆಂಬರ್ 12ರಂದು ಈ ಕುರಿತು ಕಚೇರಿ ಜ್ಞಾಪನಾ ಪತ್ರ ಹೊರಡಿಸಿದ್ದಾರೆ.

35 ವರ್ಷ ಮತ್ತು ಮೇಲ್ಪಟ್ಟ ಮಹಿಳೆಯರಿಗೆ, ಅಂದರೆ ಋತುಬಂಧಪೂರ್ವ, ಋತುಬಂಧ ಮತ್ತು ಋತುಬಂಧೋತ್ತರ ಹಂತದವರಿಗೆ ಸಮಗ್ರ ಆರೋಗ್ಯ ಸೇವೆ ಒದಗಿಸಲು ರಾಜ್ಯ ತಾಂತ್ರಿಕ ಸಮಿತಿ ಶಿಫಾರಸು ಮಾಡಿತ್ತು. ಅದರ ಆಧಾರದ ಮೇಲೆ ರೂಪಿಸಿದ ರಾಜ್ಯ ಕ್ರಿಯಾ ಯೋಜನೆಗೆ ಆಯುಕ್ತರು ಅನುಮೋದನೆ ನೀಡಿದ್ದಾರೆ. ಈ ಯೋಜನೆಯನ್ನು ಆಗಸ್ಟ್‌ನಲ್ಲಿ ಆರೋಗ್ಯ ಸಚಿವ ಯು.ಟಿ. ಖಾದರ್ ಘೋಷಿಸಿದ್ದರು. ನಟಿ ಹಾಗೂ ಮಾಜಿ ಸಂಸದೆ ರಮ್ಯಾ (ದಿವ್ಯ ಸ್ಪಂದನಾ) ಅವರನ್ನು ಅಭಿಯಾನದ ರಾಯಭಾರಿಯಾಗಿ ಹೆಸರಿಸಲಾಗಿತ್ತು.

**ಪೈಲಟ್‌ನಲ್ಲಿ ಏನೇನು?**
– ಪ್ರಾಥಮಿಕ ಆರೋಗ್ಯ ಕೇಂದ್ರ, ತಾಲೂಕು ಮತ್ತು ಜಿಲ್ಲಾ ಆಸ್ಪತ್ರೆಗಳಲ್ಲಿ ಬುಧವಾರ, ವೈದ್ಯಕೀಯ ಕಾಲೇಜುಗಳಲ್ಲಿ ಶನಿವಾರ ಪ್ರತ್ಯೇಕ ಕ್ಲಿನಿಕ್ (ಸಿಬ್ಬಂದಿ ಲಭ್ಯತೆಗೆ ಒಳಪಟ್ಟು)
– ರಕ್ತದೊತ್ತಡ, ಮಧುಮೇಹ, ಬೊಜ್ಜು ತಪಾಸಣೆ ಹಾಗೂ ಸ್ತನ ಮತ್ತು ಗರ್ಭಕಂಠ ಕ್ಯಾನ್ಸರ್ ತಪಾಸಣೆ
– ಮಾನಸಿಕ ಆರೋಗ್ಯದ ಹಸಿರು-ಹಳದಿ-ಕೆಂಪು ಅಪಾಯ ವರ್ಗೀಕರಣ, ಗೃಹ ಆರೋಗ್ಯ ಸೇವೆಯೊಂದಿಗೆ ಜೋಡಣೆ
– ಪ್ರೋಟೀನ್, ಕ್ಯಾಲ್ಸಿಯಂ ಭರಿತ ಆಹಾರ ಮತ್ತು ಮೂಳೆ ಆರೋಗ್ಯ ಕುರಿತ ಆಪ್ತಸಮಾಲೋಚನೆ
– “ಮಧ್ಯವಯಸ್ಸಿನ ಮಹಿಳಾ ಆರೋಗ್ಯ ಕಾರ್ಡ್”
– ಆಶಾ ಕಾರ್ಯಕರ್ತೆಯರು, ಸಮುದಾಯ ಆರೋಗ್ಯ ಅಧಿಕಾರಿಗಳು, ವೈದ್ಯರು, ದಾದಿಯರಿಗೆ ತರಬೇತಿ
– ಕನ್ನಡದಲ್ಲಿ ಜಾಗೃತಿ ಸಾಮಗ್ರಿ

ಜಿಲ್ಲಾ ಆರೋಗ್ಯ ಅಧಿಕಾರಿ ಮೊದಲು ಜಿಲ್ಲೆಯ ಆರೋಗ್ಯ ಸೌಲಭ್ಯಗಳನ್ನು ಗುರುತಿಸಿ, ಅರ್ಹ ಮಹಿಳೆಯರ ಪಟ್ಟಿ ಸಿದ್ಧಪಡಿಸಿ, ರೆಫರಲ್ ಮತ್ತು ಅನುಸರಣೆ ವ್ಯವಸ್ಥೆ ರೂಪಿಸಬೇಕು. ಮಾರ್ಗಸೂಚಿ, ಎಸ್‌ಒಪಿ, ತಪಾಸಣಾ ಪ್ರಶ್ನಾವಳಿ ಮತ್ತು ತರಬೇತಿ ಮಾಡ್ಯೂಲ್‌ಗಳನ್ನು ರಾಜ್ಯ ಕಾರ್ಯಕ್ರಮ ವಿಭಾಗಗಳು ತಾಂತ್ರಿಕ ಸಮಿತಿಯ ಸಮಾಲೋಚನೆಯೊಂದಿಗೆ ಅಂತಿಮಗೊಳಿಸಲಿವೆ.

**ಮೇಲ್ವಿಚಾರಣೆ, ವೆಚ್ಚ**
ಜಿಲ್ಲಾ ಆರೋಗ್ಯ ಅಧಿಕಾರಿ ಮಾಸಿಕ ಪ್ರಗತಿ ವರದಿ ಸಲ್ಲಿಸಬೇಕು. ಹಂತ ಹಂತವಾಗಿ ಡಿಜಿಟಲ್ ನೋಂದಣಿ ಮತ್ತು ಗುರುತು ಮರೆಮಾಚಿದ ರಾಜ್ಯ ಮಟ್ಟದ ಡ್ಯಾಶ್‌ಬೋರ್ಡ್ ರೂಪಿಸುವ ಸಾಧ್ಯತೆಯನ್ನೂ ಪರಿಶೀಲಿಸಲಾಗುವುದು. ಮೂರು ತಿಂಗಳ ನಂತರ ತಪಾಸಣೆ ವ್ಯಾಪ್ತಿ, ರೆಫರಲ್ ಪೂರ್ಣಗೊಳ್ಳುವಿಕೆ ಮತ್ತು ಸವಾಲುಗಳ ಮೌಲ್ಯಮಾಪನ ನಡೆಯಲಿದ್ದು, ಅದರ ಆಧಾರದ ಮೇಲೆ ರಾಜ್ಯಾದ್ಯಂತ ವಿಸ್ತರಣೆಯ ಪ್ರಸ್ತಾವನೆ ಸಲ್ಲಿಸಲಾಗುವುದು. ಆರಂಭದಲ್ಲಿ ಈಗಿರುವ ಸಾರ್ವಜನಿಕ ಆರೋಗ್ಯ ಮೂಲಸೌಕರ್ಯದಲ್ಲೇ ಯೋಜನೆ ಜಾರಿಯಾಗಲಿದ್ದು, ಹೆಚ್ಚುವರಿ ಹಣಕ್ಕೆ ಪ್ರತ್ಯೇಕ ಅನುಮೋದನೆ ಬೇಕಾಗುತ್ತದೆ.

**ರಮ್ಯಾ ಹರ್ಷ**
ಈ ಬೆಳವಣಿಗೆಯನ್ನು ರಮ್ಯಾ ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡು, “ನಾವು ಬಹಳ ಕಾಲದಿಂದ ಶ್ರಮಿಸಿದ ಕೆಲಸ ಇಂದು ನಿಜವಾಯಿತು” ಎಂದು ಸಂತಸ ವ್ಯಕ್ತಪಡಿಸಿದ್ದಾರೆ. “ಮಧ್ಯವಯಸ್ಸಿನ ಮಹಿಳೆಯರಿಗೆ ಇಷ್ಟು ಕಾಲ ‘ಹೊಂದಿಕೊಂಡು ಹೋಗಿ’ ಎಂದು ಹೇಳಲಾಗುತ್ತಿತ್ತು. ಇನ್ನು ಹಾಗಿಲ್ಲ. ಋತುಬಂಧ ಈಗ ಕರ್ನಾಟಕದಲ್ಲಿ ಸಾರ್ವಜನಿಕ ಆರೋಗ್ಯದ ಭಾಗವಾಗಿದೆ; ಉಳಿದ ರಾಜ್ಯಗಳೂ ಇದನ್ನು ಅನುಸರಿಸುತ್ತವೆ ಎಂದು ಆಶಿಸುತ್ತೇವೆ” ಎಂದು ಅವರು ಬರೆದಿದ್ದಾರೆ. ರಾಜ್ಯ ತಾಂತ್ರಿಕ ಸಮಿತಿ, ಆರೋಗ್ಯ ಇಲಾಖೆ ಹಾಗೂ ತಮ್ಮ ಅನುಭವ ಹಂಚಿಕೊಂಡ ವೈದ್ಯರು, ಸಂಶೋಧಕರು ಮತ್ತು ಮಹಿಳೆಯರಿಗೆ ಅವರು ಧನ್ಯವಾದ ಹೇಳಿದ್ದಾರೆ. “ಇದು ಕೇವಲ ಆರಂಭ” ಎಂದೂ ಹೇಳಿದ್ದಾರೆ.